Audi EV 化路線再度出現轉折。三年前，奧迪雄心勃勃宣布要喺 2032 年全面放棄燃油引擎，只賣純電車。但 CEO Gernot Döllner 最近承認，呢個目標已經擱置，公司將繼續銷售燃油車「仲有七、八，甚至十年」。
Audi
支持歐盟禁令 但路線比對手搖擺
雖然計劃退後，但 Döllner 仲係強調，電動車係唯一可行嘅減排方案。佢公開支持歐盟 2035 年停售燃油新車嘅法案，仲直斥不斷討論放寬禁令「只會令客戶更不安」。
有趣嘅係，BMW 同 Mercedes 一直公開反對呢個禁令，態度明顯比 Audi 保守得多。換句話講，Audi 嘅官方立場係「電動係唯一方向」，但實際銷售策略就不得不保持彈性。
Audi
EV 成績唔理想 退後一步
點解要退後？數據講到明。去年 Audi 純電交付量跌咗 7.8%，只得 164,480 輛，純電佔比仲不足 一成（9.7%）。相比起燃油車，EV 人氣明顯未到位，更加談不上支撐整個品牌盈利。
編輯角度嚟睇，Audi 嘅轉向唔難理解 —— 內燃機車依然有高毛利，可以用嚟 養起未來 EV 研發。完全放棄燃油，風險太大。
Audi
雖然純汽油車喺 2035 年後幾乎冇可能再被允許，但市場普遍估計，PHEV（插混）同增程式電動車仲可能有一席位。Volkswagen Group 正開發嘅 SSP 平台據報支持「內燃機作為發電機」嘅設計，Audi 好大機會率先用喺歐洲新一代 A4 上。
問題係，技術理想最終都要接受市場驗證。即使 CEO 高調表態支持電動化，但現時消費者暫時對EV冇太大興趣，特別係加拿大市場，情況更加明顯。根據早前報道，加拿大純電車銷量已經開始下跌，政府原先訂立嘅 EV Mandate（強制電動車銷售比例） 亦逐步退場。呢個背景對 Audi 來講，無疑係一個現實提醒：推動 EV 唔可以單靠理想口號，仲要有消費者認同同政策配合。
Audi 口口聲聲話「電動係最好技術」，但暫時仍然要靠燃油車頂住基本盤。加拿大市場嘅例子正好印證咗一點：政策可以推，但消費者選擇更殘酷。最終電動化能否成功，唔係董事會話事，而係市場決定
講白啲，呢場電動化比賽唔再係理想主義，而係現實生意 —— 有市場、有利潤，品牌先可以行到最後。
