加拿大電動車強制令(EV Mandate)逐步退場　ZEV 政策陷入「數據現實」

加拿大政府曾經強硬推行嘅 電動車強制令（EV Mandate），如今正式面臨大逆轉。魁北克已經削弱咗零排放車（ZEV）標準、不再堅持全電動；卑詩省亦傳出有意重新檢視自己嘅方針。而上星期，總理 Mark Carney 更公開表示將暫停前總理 Justin Trudeau 設下嘅全國性計劃。就連《環球郵報》社論都直言：「渥太華應該拔掉 EV Mandate 嘅插頭。」呢個曾經被視為「氣候政策核心」嘅計劃，似乎真係已經去到盡頭。

現實數據：增長目標幾乎不可能

原本計劃要求 2026 年起 20% 新車銷量必須屬於 ZEV，包括純電與插電混能。但根據最新數字，加拿大現時 ZEV 佔比只得 8.6%，換言之，短短 18 個月內銷量要翻倍以上。偏偏數據顯示情況完全相反——純電銷量按年下跌 39.2%，插電混能亦跌 2.2%。相反，傳統 Hybrid（非插電）反而暴升 60%。

呢組數字已經反映，加拿大消費者嘅接受度遠低於歐洲，缺乏大額補貼下，市場根本無法達到官方既定目標。無論係基建不足、冬天續航大幅縮水，抑或車價仍然偏高，都令 EV 強制令變得「紙上談兵」。

EV Mandate 政策走向：放寬、延後，還是轉向？

下一步，有幾個可能選項：

• 維持原有 2035 年禁售燃油車時限：但政治上幾乎不可行。
• 修改 ZEV 定義：參考魁北克做法，將 Hybrid 納入「零排放車」範疇，以保住政治承諾。
• 回歸排放標準：放棄指定動力，改為針對整體車隊溫室氣體排放，讓車廠用自己方法達標。

對自由黨而言，完全放棄會得罪環保選民；但延後或修改定義，則有機會成為最現實嘅折衷方案。

講到底，崩潰最大原因其實就係「數據唔掂」。推行強制令本來要靠銷量增長托住，但市場反應偏冷淡，反而 Hybrid 更受歡迎。再加上基建進度落後，長途充電焦慮未解決，對多數家庭嚟講，EV 仍然係昂貴同唔方便的選項。

而家問題唔係「要唔要電動車」，而係「點樣有效減碳」。或許比起硬性規定 ZEV 佔比，重新聚焦排放標準，反而能夠鼓勵更多技術創新。

加拿大嘅 電動車強制令 已經逐步退場，從魁北克到渥太華，整個政治氛圍都顯示：原有目標難以為繼。接下來點樣平衡減碳承諾與市場現實，將會成為自由黨與保守黨下一場政策角力的焦點。

想睇更多車壇新聞？
歡迎重溫我哋之前介紹過嘅