Mercedes G-Class Cabriolet 回歸!?　相隔十年再現開篷方盒

距離上一部 G-Class Cabriolet 已經超過十年。雖然 2017 年仲有過一部超瘋狂嘅 Maybach G650 Landaulet，但限量 99 部，更多係收藏品多過實用車。至於 2018 年換代嘅現行 G-Wagen，就再冇出過敞篷版本，除咗偶爾有 Brabus 改裝特製款。

而家終於等到，Mercedes 官方已經放出預告，確認會推出全新Cabriolet。新車同樣喺奧地利 Graz 嘅 Magna Steyr 工廠生產，並將會喺全球幾乎所有市場販售，包括美國市場。

資料來源: Motor 1

G-Class Cabriolet 設計走向

預告圖顯示，新款Cabriolet 可能會採用 Landaulet 式樣嘅軟篷輪廓，車頂延伸至車尾，視覺上比舊世代短頂版本更修長。由於現行 G-Class 全線只提供四門車型，所以今次開篷版亦大有機會維持四門設定。

雖然用咗 “Cabriolet” 名字，但唔好期望佢會好似 G650 Landaulet 咁極端——冇 V12、冇 portal axles。據悉，新車基礎會係 G550，配搭可折疊軟篷，而唔係走 AMG 嘅「瘋狂性能」路線。當然，唔排除將來會再推出 G450d 柴油 Cabriolet，畢竟 Mercedes 暗示會以燃油版為主，而唔係去到純電 G580 嗰個層次。

Cabriolet 嘅消息出現，正值 G-Class 上月慶祝生產 第 60 萬台，距離 1979 年首部 G 誕生已經 46 年。Mercedes 暫時未講清楚發表日期，但既然 teaser 已經放出，外界估計今年年底前就會正式亮相，2026 年開售。

至於售價，肯定會比標準 G550 更高。參考美國 G550 基本價已經去到 $149,400 美金（含運費），Cabriolet 要加 premium 幾乎係必然。

開篷 SUV 本身就係 niche 市場，但對 G-Class 嚟講，呢個身份同玩味值遠比實用性重要。開篷 G 擺喺多倫多夏天湖邊公路或者溫哥華山路出現，必定成為焦點；咁冬天就可能冇咁實際，但相信買得呢類車嘅人，實用性唔會放第一位。

👉 有興趣嘅讀者可以睇埋呢段以前 Cabriolet 嘅影片（下方連結），感受下經典方盒開篷版嘅獨特魅力。