Mercedes 設計總監開火　直言 BMW 同 Audi 內裝走錯方向

德國三大豪華品牌之間嘅「隔空交火」向來唔少，不過今次輪到 Mercedes-Benz 設計總監 Gorden Wagener 親自出手。喺接受 Top Gear 訪問時，佢直言 BMW 同 Audi 嘅最新內裝設計「唔係路」，更大膽形容 Audi Concept C 嘅內櫳「好似回到 1995 年」。

Photo: Top Gear

點名批評 BMW iX3「Panoramic Vision」

BMW 最新 iX3 推出嘅 Panoramic Vision，技術上唔係傳統螢幕，而係一個投影系統，橫跨 A 柱到 A 柱，將資訊投射到擋風玻璃底部。雖然呢個設計標榜前衛，但 Wagener 就毫不留情：「我唔係好 buy。因為距離太遠，資訊變得好細難睇，又唔可以直接觸控，最後仲要加返個觸控屏去操作，變得多此一舉。」

Benz 自己喺電動 GLC 已經用上 39.1 吋 Hyperscreen，同樣係「屏幕霸佔」路線。但 Wagener 認為至少大屏幕有清晰參照，仲可以提供娛樂功能，反而比 BMW 呢種投影更實際。

Audi Concept C：太舊式，欠科技感

唔止 BMW，中槍嘅仲有 Audi。面向未來嘅 Concept C 電動跑車，主打簡約內櫳同隱藏式螢幕，但 Wagener 就狠批：「嗰個內櫳好似 1995 年設計，太過熟悉，技術感唔夠。」

Audi Concept C 內櫳配備 10.4 吋屏幕，可以收納進中控，表面睇上去乾淨簡約。但對比 Bnez 推動大屏幕、全數碼化，Wagener 明顯認為 Audi 嘅做法落伍，仲加多句：「小螢幕只適合小型車，放喺跑車就唔合理。」

老實講，高層公開點名「踩對手」並唔常見，今次 Wagener 一口氣批 BMW 又批 Audi，肯定會引起爭議。不過亦有人會覺得，呢份直率反而值得肯定。事實上，內櫳設計無論係全屏幕、投影定隱藏式，都係「好睇唔好睇」嘅爭拗點，更多係風格取向問題。

但可以肯定嘅係，Benz 係堅定咁走「大屏幕」路線——GLC 已經用上 39.1 吋 Hyperscreen，下一步就係 2026 年登場嘅 純電 C-Class。至於 BMW 同 Audi 嘅「另類路線」能唔能夠得到市場認同，真係要等時間證明。

想睇更多車壇新聞？
歡迎重溫我哋之前介紹過嘅