2026 Cayenne EV 將配備Porsche Wireless Charging Pad　搶先 Tesla 實現「停車即充」

Porsche 喺慕尼黑 IAA Mobility 車展期間，正式公佈將為即將上市嘅 2026 Cayenne EV 推出 Porsche Wireless Charging Pad，做到「SUV 像手機一樣充電」嘅體驗。呢個功能原本外界普遍認為會由 Tesla 率先推出，但結果 Porsche 反而搶先一步，成為首個實際商品化嘅豪華品牌。

Porsche

停好就能充：11kW 功率，90% 效率

Porsche Wireless Charging Pad 原理同智能手機差唔多。車主只需將車泊喺黑色地板板塊上，底盤與板塊會透過磁場進行感應，功率高達 11 kW，效率聲稱可達 90%，與傳統二級充電（Level 2）相差不大。對於唔想再日日插插頭嘅車主，呢個功能可算係大大提升便利性。

技術細節：結構一體化，非後加式

Porsche 無線充電系統分為兩部分：

• 地面充電板：外觀低調，重達約 110 磅，能應付嚴寒至酷熱環境。
• 車底感應板：液冷設計，需喺生產階段就預先安裝，重量約 33 磅。

由於系統已經整合到車身結構，所以並唔支援舊款 EV retro-fit，只能由新車出廠時選配。不過，如果有預留預線配置，之後亦可於 Porsche Dealer 裝配。

Porsche

安全方面，Porsche 為呢個無線充電板加入多重感應器：

• 雷達偵測小動物或小朋友，有異物靠近即時暫停充電。
• 金屬異物感應（例如工具、螺絲），會即時切斷輸出，避免發熱。
• 環境適應：落葉、雨水、積雪唔會影響充電，全年可擺放喺車道。

官方仲強調，呢個充電板足以承受大型 SUV（例如 Hummer）直接輾壓，唔會損壞。

自動泊車對準

實際操作上，Cayenne EV 配合泊車輔助功能，會自動引導車身停到正確位置。車主喺中控屏幕只需對準兩個圓圈圖示，車輛會自動降低氣壓懸掛，確保車底與地板充電板保持最佳距離。過程幾乎完全自動化，簡單得同連接 Wi-Fi 差唔多。

Porsche

Porsche USA 尚未公佈售價，但德國市場工程師透露，無線充電完整套件售價約 9,500 美元。雖然價格唔算便宜，但對 Cayenne EV 客群而言，呢種「泊好就能充」嘅豪華便利性，相信有一定吸引力。

值得一提，Tesla 早前多次暗示會推出無線充電板，甚至收購相關技術公司，但至今仍未有量產版本。反而係 Porsche 搶先一步，率先將無線充電由「概念」變成「實物」。雖然效率未必比傳統直插快充更優，但對於追求便利同豪華體驗嘅 SUV 用家，呢個技術本身就已經係一種「品牌附加值」。

Tesla

Porsche

2026 Cayenne EV 無線充電板將成為 Porsche 在豪華電動 SUV 市場嘅一個獨特賣點。當大家仍在觀望 Tesla 何時實現，Porsche 已經搶先一步，把無線充電由手機搬到汽車。至於消費者會唔會接受近一萬美元的便利，就要等 Cayenne EV 上市後見真章。

想睇更多車壇新聞？
歡迎重溫我哋之前介紹過嘅